Þulustarfið á Rúv: Karlar geta líka verið til skrauts

„Ef það á að vera skraut þá geta karlar alveg líka verið skraut," segir Gísli Hrafn Atlason talsmaður karlahóps Feministafélags Íslands um kynjahluttföllin hjá þulunum á Rúv.

Guðmundur H. Bragason var síðasta vígi karlkyns þula á Ríkisútvarpinu en hann hefur nú lokið keppni. Þar verða nú sex konur sem gegna þulustarfinu.

„Við viljum jafna kynjaskiptingu þarna eins og allsstaðar annarsstaðar," segir Gísli sem var í óða önn við skipulagningu á ráðstefnu og hafði því lítið kynnt sér nýju þulurnar í Efstaleitinu.

Ríkissjónvarpið auglýsti eftir þulum nýlega og voru yfir hundrað manns sem sóttu um starfið. Þar af voru 18 karlar en enginn þeirra virðist hafa heillað yfirmenn Ríkissjónvarpsins. „Stelpurnar voru einfaldlega betri og við völdum út frá hæfileikum og getu," sagði Þórhallur Gunnarsson dagskrárstjóri við Fréttablaðið í morgun.

Stúlkurnar sem nú mynda þuluteymið á Rúv eru engu að síður stórglæsilegar og verður gaman að fylgjast með framgöngu nýju stelpnanna á skjánum. Þær Eva Sólan og Katrín Brynja Hermannsdóttir verða áfram. En nýju stelpurnar heita Matthildur Magnúsdóttir, Anna Rún Frímannsdóttir, Sigurlaug Jónsdóttir og Sigríður Halldórsdóttir.