Mannréttindi samþætt í utanríkisstefnuna

Mannréttindi eiga að vera samofin öllu atferli í utanríkisstefnu Íslendinga, sagði utanríkisráðherra þegar hann gaf Alþingi skýrslu um utanríkismál í dag. Formaður Vinstri grænna segir sömu hernaðarhyggjuna og áður ráða áherslum ríkisstjórnarinnar í varnarmálum.

Utanríkisráðherra reifaði stefnuna í öllum helstu málaflokkum utanríkisráðuneytisins í fyrstu skýrslu sinni um utanríkismál til Alþingis í dag, nema Evrópumál, sem hún boðaði sérstaka skýrslu um til Alþingis í janúar. Ingibjörg Sólrún sagði að sérstök áhersla yrði lögð á að þróunarhjálp kæmi konum og börnum til góða og nýttist til aukinnar menntunar. Þá yrði meiri áhersla lögð á málefni Miðausturlanda en gert hefði verið og rík áhersla lögð á samvinnu þjóða um framtíð norðurslóða. Ráðherra leggur áherslu á að mannréttindi verði samþætt í alla þætti utanríkisstefnunnar.

"Ég árétta þá afstöðu íslenskra stjórnvalda að baráttuna gegn hryðjuverkum megi aldrei heyja á kostnað mannréttinda og virða skuli alþjóðlegar mannúðar- og mannréttindareglur skilyrðislaust í þeirri baráttu," sagði utanríkisráðherra.

Utanríkisráðherra undirstrikaði mikilvægi starfa Íslensku friðargæslunnar sem nú tæki þátt í verkefnum í átta löndum. Og í varnarmálum hefði hafist nýtt skeið við brottför Bandaríkjahers frá landinu.

Ingibjörg Sólrún sagði að vitaskuld vægi varnarsamningurinn við Bandaríkin frá árinu 1951 þungt í vörnum Íslands. En nýir rammasamningar við Noreg og Danmörku um samstarf á sviði öryggis- og varnarmála á friðartímum væru mikilvægir. Þá væri viðlíka samstarf við Bretland og Kanada, Þýskaland og Frakkland í deiglunni.

Steingrímur J. Sigfússon formaður Vinstri grænna fagnaði áherslum á málefni norðurslóða, en hann var ekki eins ánægður með stefnuna í öryggis- og varnarmálum og sagði að nú stefndi í að hernaðarleg útgjöld Íslendinga yrðu á bilinu 2,1 - 2,6 milljarðar króna á ári.

"Og ég held að við séum að glata hér niður alveg sorglega góðu tækifæri til að brjóta í blað í utanríkismálum Íslands og endurskilgreina þetta viðfangsefni. Það erum við því miður ekki að gera," sagði Steingrímur. Stefna ríkisstjórnarinnar væri því miður föst í gömlum farvegi hernaðarhyggjunnar.