Fá strimil áður en skrifað er undir greiðslukvittun

Samtök verslunar og þjónustu hafa fallist á tilmæli talsmanns neytenda um að neytendur fái vörustrimil um leið og greiðslukvittun til að tryggja að samræmi sé á milli kassaverðs og hilluverðs. Þetta kemur fram á heimasíðu talsmanns neytenda.

Þar er bent á það sé orðið algengt að íslenskum neytendum sé ekki afhentur strimill yfir það sem keypt er ásamt greiðslukorti fyrr en þeir hafa skrifað undir greiðslukvittun. Segir talsmaður neytenda að þá sé erfiðara fyrir neytendur að gera athugasemd við afgreiðslukassa þar sem viðskiptum er lokið og vörur frá næsta viðskiptavini stundum komnar í afgreiðslu. Þegar heim sé komið sé bæði lengra liðið frá því að neytandi leit á hilluverð og auk þess viðbótarumstang og kostnaður við að snúa til baka og gera athugasemd ef kassaverð reynist hærra en hilluverð eða vöruliðum jafnvel ofaukið.

Þrátt fyrir hugsanlegar tafir í sumum tilvikum telur talsmaður neytenda hins vegar í ljósi þess að enn sé nokkurt misræmi á milli hilluverðs og kassaverðs að óeðlilegt sé að ætla neytendum að skrifa undir greiðslukvittun áður en þeir geti sannreynt hvort samræmi sé í verði á kassa og í hillu. „Þó að aðeins sumir neytendur nýti sér þennan kost í raun og kanni í sumum tilvikum e.t.v. bara tiltekna vöruliði er þessi breyting til þess fallin að auðvelda neytendum sjálfsagt aðhald og hvetja verslanir til þess að tryggja samræmi milli hilluverðs og kassaverðs eins og skylt er," segir talsmaður neytenda.