Villi sagði Geir frá samrunanum í „tveggja manna tali“

Geir Haarde segir fráleitt að halda því fram að hann hafi lagt blessun sína yfir samruna Geysis Green Energy og REI. Hann segir að Vilhjálmur Vilhjálmsson, fyrrverandi borgarstjóri Reykjavíkur hefði ekki kynnt honum efnislega fyrirætlanir um samrunann áður en kynningarfundur var haldinn um málið fyrir borgarstjórnarmeirihlutann. Vilhjálmur hafi reyndar minnst á fyrirætlanirnar í „tveggja manna tali", án þess að fara efnislega yfir málið. Þetta kom fram í viðtali sem Geir veitti í kvöldfréttum RÚV. Geir hefur neitað að tjá sig um málið við Vísi og fréttastofu Stöðvar 2 í dag þrátt fyrir ítrekaðar tilraunir.

Björn Ingi Hrafnsson, borgarfulltrúi Framsóknarflokksins, segir á heimasíðu sinni að Vilhjálmur Þ. Vilhjálmsson, þáverandi borgarstjóri, hafi kynnt samrunahugmyndir Geysis Green Energy og Reykjavík Energy Invest fyrir Geir H. Haarde forsætisráðherra áður en kynningarfundur var haldinn um málið fyrir þáverandi borgarstjórnarmeirihluta. Segir Björn Ingi ennfremur að forsætisráðherra hafi tekið vel í hugmyndina.

Jón Kristinn Snæhólm, fyrrverandi aðstoðarmaður Vilhjálms staðfesti í samtali við blaðamann Vísis fyrr í dag að Vilhjálmur hefði kynnt málið fyrir Geir áður en kynningarfundurinn var haldinn. Jón minnti þó á að á þeim tímapunkti hefðu hvorki Vihjálmur né Geir vitað af kaupréttarsamningum eða 20 ára einkarétti REI á öllum verkenum OR á erlendri grund. Jón Kristinn sagðist hafa sett sig í samband við Vihjálm sem hefði staðfest að fundurinn hefði átt sér stað.

Hálftíma síðar hafði Jón Kristinn hins vegar samband við Vísi og sagðist hafa misskilið orð fyrrverandi borgarstjóra. Dró hann til baka þær fullyrðingar um að Vilhjálmur hefði hitt Geir og kynnt samruna fyrirtækjanna sérstaklega.