Telur Orkuveituna ekki skaðabótaskylda vegna REI-máls

Eins og greint var frá í fréttum í gær ákvað borgarráð að fara að tillögum stýrihóps um málefni Orkuveitunnar og REI og hafna samruna REI og Geysis Green Energy. Var stjórn Orkuveitunnar falið að ganga frá málinu.

Bryndís segir að þessi beiðni borgarráðs verði aðalumræðuefni fundarins í dag sem og samrunamál REI í heild sinni. „Við munum fara yfir það í rólegheitum hvernig staðan er og hvernig unnið verður úr þessari ósk. Við eigum eftir að leggja það niður hvernig við útfærum þetta," segir Bryndís. Hún segir aðspurð að stjórnin muni jafnframt fara yfir hlut stjórnar Orkuveitunnar í málinu.

Aðspurð segir Bryndís að hún telji ekki persónulega að það hafi skapast skaðabótaskylda af hálfu Orkuveitunnar vegna ákvörðunar borgarráðs eins og ýjað hefur verið að. Hún ætli þó ekki að fara að karpa um lögfræðileg álitamál en þetta sé eitt af því sem stjórn Orkuveitunnar skoði. „Við munum vinna rólega að þessu máli því ef það er eitthvað sem má læra af fyrri stigum þessa máls þá er það að vanda sig. Við munum fara kyrfilega yfir það," segir Bryndís.

Bryndís bendir enn fremur á að meirihluti í stjórn Orkuveitunnar og borgarinnar styðji áfram útrás REI og það verði stjórnar Orkuveitunnar að kanna vel þau mál. Hins vegar viti hún ekki að hvaða niðurstaða verði ofan á þar.