50 þúsund krónur í bætur fyrir hlerun

Hæstiréttur dæmdi í dag íslenska ríkið til að greiða karlmanni 50 þúsund krónur í skaðabætur vegna vegna þess að sími hans var hleraður í tvær vikur í tengslum við bruna á Sauðárkróki fyrir um þremur árum.

Einn maður lést í brunanum og var sá sem stefndi ríkinu grunaður um aðild að brunanum og dauða mannsins. Lögregla fékk samkvæmt dómsúrskurði að skoða símtöl mannsins nóttina sem bruninn varð og hlera síma hans í tvær vikur vegna málsins en engin ákæra var gefin út í málinu.

Héraðsdómur féllst á það hleranirnar hefðu falið í sér skerðingu á friðhelgi einkalífs mannsins og voru honum því dæmdar 50 þúsund krónur í bætur en hann hafði farið fram á hálfa milljón króna.

Í niðurstöðu Hæstaréttar segir að við þær aðstæður að rannsókn á brunaleifum var ekki lokið og talið var að eldhvetjandi efni hefðu verið notuð við íkveikjuna hefði verið réttmætt að athuga símnotkun mannsins í skamman tíma áður en eldur kom upp.

Hins vegar þóttu ekki hafa verið fyrir hendi lögmæt skilyrði fyrir símhleruninni, en grunur lögreglu beindist aldrei að því að fleiri gætu verið samsekir þannig að réttlætt gæti hlerun né gat sú aðstaða ein og sér að maðurinn játaði ekki brot þrátt fyrir grunsemdir lögreglu gefið tilefni til aðgerðarinnar. Var því niðurstaða héraðsdóms um greiðslu miskabóta staðfest.