Björgun hf fær lóð við Álfsnes

Hafnarstjórn vinnur nú að því að finna nýja lóð undir starfsemi Björgunnar hf. á Sævarhöfða. Íbúar Bryggjuhverfisins í grennd við Björgun hafa kvartað undan mikilli mengun frá starfseminni. Að öllum líkindum mun Björgun hf fá lóð við Álfsnes í Kollafirði.

Fjallað var um málið á stjórnarfundi Faxaflóahafna í vikunni. Gísli Gíslason hafnarstjóri segir að hann hafi gert grein fyrir stöðunni en í þessum mánuði bárust höfninni óskir íbúa Bryggjuhverfisins um að eitthvað yrði gert í málinu.

"Við erum að leita að nýrri lóð undir starfsemi Björgunnar og ég reikna með að hún verði á Álfsnesinu," segir Gísli Gíslason. "Það er lykilatriði fyrir íbúanna, fyrirtækið og borgina að sátt náist í málinu. Ég tel málið vera á réttri leið."