Vill fá upplýsingar um brot á samkeppnislögum

Samkeppniseftirlitið hvetur þá sem telja sig hafa upplýsinga um brot á samkeppnislögum til þess að koma þeim upplýsingum á framfæri við eftirlitið. Þetta segir eftirlitið í yfirlýsingu í framhaldi af umræðu um meint verðsamráð á matvörumarkaði.

Segir Samkeppniseftirlitið að hægt sé að koma slíkum upplýsingum á framfæri í síma eða á skrifstofu eftirlitsins en einnig á heimasíðu Samkeppniseftirlitsins, www.samkeppni.is, nafnlaust eða undir nafni. Gætt er trúnaðar í öllum samskiptum sé þess óskað.

Tekur Samkeppniseftirlitið fram að æskilegt sé að upplýsingar um samkeppnisbrot séu eins ítarlegar og hægt er, s.s. um það hvaða fyrirtæki sé að ræða, hvenær brotin hafi átt sér stað, hvernig staðið hafi verið að samráði og hversu umfangsmikið það hafi verið.

Í fréttum hefur einnig verið fjallað um verðbreytingar hjá Krónunni og Bónus í tengslum við verðkannanir og segir Samkeppniseftirlitið að það taki einnig við ábendingum þar að lútandi. Samkeppniseftirlitið fer yfir þær og beinir þeim í réttan farveg, s.s. til Neytendastofu sem fer með eftirlit með lagaákvæðum um óréttmæta viðskiptahætti og verðmerkingar.