Embætti borgarritara aftur lagt niður

Dagur B. Eggertsson borgarstjóri lagði fram þá tillögu á fundi borgarráðs á fimmtudag að samþykkt yrði að leggja niður stöðu borgarritara. Hún var endurvakin í lok júní í sumar í borgarstjóratíð Vilhjálms Þ. Vilhjálmssonar.

Embætti borgarritara var fyrst lagt niður á árunum 2004-2005 ásamt embætti borgarlögmanns en meirihluti sjálfstæðismanna og framsóknarmanna ákvað að endurvekja embættin í sumar.

Fram kom í tilkynningu vegna breytinganna að borgaritari ætti að taka við verkefnum fjármálasviðs, stjórnsýslu- og starfsmannasviðs og þjónustu- og rekstrarsviðs í Ráðhúsinu og að þau yrðu lögð niður. Þá átti borgarritari að verða staðgengill borgarstjóra. Magnús Þór Gylfason, skrifstofustjóri borgarstjóra, hafði sinnt stöðunni tímabundið.  

Dagur B. Eggertsson borgarstjóri lagði svo fram tillögu á fundi borgarráðs á fimmtudaginn var um að leggja embætti borgarritara niður. Jafnfram að skrifstofustjórar fagskrifstofa í Ráðhúsinu heyrðu beint undir borgarstjóra. Er þar um að ræða borgarhagfræðing, fjármálastjóra, innkaupastjóra, mannauðsstjóra, upplýsingatæknistjóra og þjónustustjóra borgarinnar. Tillögu borgarstjóra var hins vegar frestað til næsta fundar borgarráðs þar sem minnihlutinn óskaði eftir því að fá að kynna sér málið betur.

Guðmundur Steingrímsson, aðstoðarmaður borgarstjóra, segir að með því að leggja niður embætti borgarritara sé í raun verið að straumlínulaga stjórnsýslu borgarinnar og einfalda hana. Með þessu heyri stjórnendur fagskrifstofa beint undir borgarstjóra í stað þess að borgarritari sé milliliður þar á milli. Aðspurður segir Guðmundur að enginn sitji í embætti borgarritara eftir stjórnarslit Framsóknarflokksins og Sjálfstæðisflokksins.

Á fundi borgarráðs á fimmtudag var jafnframt lagt til að Hrólfur Jónsson, sviðsstjóri framkvæmdasviðs, yrði ráðinn framkvæmdastjóri eignasjóðs borgarinnar. Eignasjóður á að taka við af framkvæmdasviðinu og fara með allar fasteignir borgarinnar. Afgreiðslu þeirrar tillögu var frestað og sömuleiðis þeirri tillögu að ráða Birgi Björn Sigurjónsson, mannauðsstjóra borgarinnar, í stöðu fjármálastjóra Reykjavíkurborgar til eins árs.