Fráleitt að Viðskiptaráð vinni gegn samkeppni á bankamarkaði

Finnur Oddsson, framkvæmdastjóri Viðskiptaráðs, hafnar því sem fram kom í hádegisfréttum Stöðvar 2 að ráðið vinni gegn samkeppni á bankamarkaði.

Viðskiptaráð sendi frá sér ályktun nýlega þar sem afnámi vörugjalda og stimipilgjalda er fagnað og sagt stórt skref í átt að einfaldara og skilvirkara hagkerfi. Hins vegar leggst Viðskiptaráð gegn hugmyndum viðskiptaráðherra um beitingu lagasetningar á sviði gjaldtöku fjármála- og innheimtufyrirtækja. Segir ráðið að áform um afnám uppgreiðslugjalda hljóta að snúa eingöngu að Íbúðalánasjóði enda ekki grundvöllur fyrir því að meina viðskiptabönkum og sparisjóðum að innheimta slík gjöld.

Finnur Oddsson, framkvæmdastjóri Viðskiptaráðs, bendir á að fólk geti í dag tekið lán með og án uppgreiðslugjalds hjá bönkunum en skilmálar séu breytilegar á milli banka. Vextir af lánum með uppgreiðslugjaldi séu lægri en vextir af lánum án uppgreiðslugjalds. Það sé því eftir nokkru að slægjast fyrir fólk að taka lán með uppgreiðslugjaldi.

Bankarnir greiði sjálfir uppgreiðslugjald

Finnur bendir hins vegar á að ef bankar væru knúnir til þess að fella niður uppgreiðslugjaldið þyrftu þeir að hækka vexti því uppgreiðslugjaldið sé til komið vegna kostnaðs banka af lántöku. Ef til uppgreiðslu kemur verða þeir sjálfir fyrir kostnaði, það er þeir þurfi að greiða sjálfir uppgreiðslugjald. Gjaldið sé hluti af áhættustýringu bankanna.

Ef vextir bankanna hækkuðu myndi eftirspurnin minnka og þá myndi staðan á fasteignalánamarkaði skekkjast enn frekar. „Viljum við hverfa aftur til tímans þegar Íbúðalánasjóður var allsráðandi á þessum markaði?" spyr Finnur. Hann bendir á að neytendur eigi að hafa frelsi til þess að semja um kjör við sína lánastofnun og á það leggi Viðskiptaráð áherslu. Því sé fjarri að ráðið vinni gegn samkeppni á bankamarkaði eins og haldið hafi verið fram.