Geir Jón sáttur með nýju fötin

„Það er almenn ánægja með nýju búningana sem eru að koma í hús þessa dagana," segir Geir Jón Þórisson yfirlögregluþjónn hjá lögreglunni en nýir lögreglubúningar verða teknir í notkun 1.nóvember.

Það er töluverð bylting í nýja búningnum og þá sérstaklega í húfunni sem er svörtu og minnir nokkuð á þá bresku. „Endurskinið greinir okkur frá öðrum eins og t.d tollvörðum og öryggisvörðum, það er komið inn í reglugerð að það má enginn annar nota þetta endurskin," segir Geir Jón sem staddur var í fríi í Bandaríkjunum þegar vísir náði af honum tali.

Geir Jón var í búninganefndinni og segir hann fatnaðinn eiga eftir að vera í stöðugri þróun. „Fatanefndin verður lifandi og skoðar stöðuna á hverjum tíma. Grundvallarbreytingin er líka sú að nú verða lögregluþjónar í svörtum skyrtum í stað hvítra. Við erum að færa okkur fjær evrópu í því, en víðast hvar eru menn í bláum skyrtum."

Eins og fyrr segir minnir nýi búningurinn nokkuð á þann breska og því hafa einhverjir velt því fyrir sér hvort íslenska lögreglan ætli að líkjast þeirri bresku í fleiri atriðum, eins og til dæmis að nota íslenska hestinn meira við löggæslustörf?

„Við höfum verið á hestum en þeir nýtast ekki í borgum eins og erlendis þar sem íslenski hesturinn er smærri og minna ógnandi. En það er ekkert því til fyrirstöðu að nýta hesta meira . Það hefur meira að segja komið upp sú umræða."