Airwaves: Mugison er rokkskrímsli

Ólafur Páll Gunnarsson, einn helsti poppsérfræðingur landsins, segir að Mugison hafi staðið uppi sem einn helsti sigurvegari Airwaveshátíðarinnar. "Mugison er rokkskrímsli og það er óhætt að segja að hann hafi verið fremstur meðal jafningja á þessari hátíð," segir Óli Palli.

Hann bætir við að íslenskir tónlistarmenn hafi að sínu mati verið öflugari og skemmtilegri en erlendir kollegar sínir á hátíðinni. Auk Mugison nefnir Ólafur Pétur Ben sem einn þeirra sem staðið hafi upp úr á hátíðinni með framkomu sinni og spilamennsku.

Atli Fannar Bjarkarson, tónlistarsérfræðingur dagblaðsins 24 stunda, tekur undir með Óla Palla að því leiti að íslenskir listamenn hafi verið eftirtektarverðastir á Airwaves. Atli nefnir helst í því sambandi hljómsveitirnar Kimono og Lights on the Higway.

Pétur Valsson, sem skrifar fyrir tónlistarvefsíðunna rjominn.is, segir að íslenska sveitin FM Belfast hafi staðið upp úr að sínu mati.

Bæði Pétur og Atli Fannar segja Airwaves hátíðina hafa verið með besta móti þetta árið og sjaldan, jafnvel aldrei, hafi tekist jafnvel upp við skipulagningu hennar.