Milljarðaverkefni hjá REI þrátt fyrir óvissa framtíð

Í næstu viku verða opnuð tilboð í 40% hlut í stærsta jarðvarmaorkufyrirtæki heims, PNOC EDC á Filippseyjum. REI er eitt þeirra fyrirtækja sem bjóða í hlutinn en reiknað er með að andvirði hans nemi um einum tug milljarða kr.. Einnig verður undirrtaður samstarfssamningur REI við fyrirtækið Pertamína um orkuvinnslu í Indónesíu. "Við höldum okkar áætlunum og markmiðum áfram þar til annað kemur í ljós," segir Hafliði Helgason talsmaður REI í samtali við Vísi.

Hafliði segir að REI leiði hjá sér þær umræður og deilur sem orðið hafa um fyrirtækið á undanförnum dögum og haldi sínu striki þrátt fyrir óvissuna um framtíð fyrirtækisins. "Það er ekkert um annað fyrir okkur að ræða," segir Hafliði.

Össur Skarphéðinsson iðnaðarráðherra verður viðstaddur á báðum fyrrgreindum löndum en hann heldur í vinnuferð til Indónesíu og Filippseyja nú á laugardag. Einar Karl Haraldsson aðstoðarmaður iðnaðarráðherra segir í samtali við Vísi að Össur sé að endurgjalda heimsókn orkumálaráðherra Indónesíu til Íslands fyrr í ár og viðræður við ráðherrann sé aðalástæða ferðarinnar. Sama sé upp á teningnum á Filippseyjum, það er viðræður við orkumálaráðherra þess lands.

„Össur hefur áður lýst því yfir að eitt af forgangsverkefnum sínum sé að styðja við útrás Íslendinga í orkumálum og því verður hann viðstaddur þessa tvo viðburði þar sem REI kemur við sögu," segir Einar Karl.