Vilhjálmur fær meiri tíma til að spila golf

Borgarfulltrúar Sjálfstæðisflokksins héldu sameiginlegan blaðamannafund nú síðdegis. Að loknum stuttum ræðum Vilhjálms, fyrrverandi borgarstjóra, Gísla Marteins Baldurssonar og Hönnu Birnu Kristjánsdóttur svöruðu borgarfulltrúarnir spurningum fjölmiðla. Fyrsta spurningin snérist um framtíð Vilhjálms.

„Það er allveg ljóst að ég er ekki borgarstjóri lengur," sagði Vilhjálmur. „Ég mun starfa áfram og veita minnihlutanum aðhald og ég hlakka til að takast á við þennan hóp." Vilhjálmur segist ekki hafa mikla trú á samstarfi nýs meirihluta og segir stjórnina verða slæma og tætta.

Hann sagði undarlegt að fyrrverandi minnihlutaflokkum skuli duga handaband þegar samstarf við Björn Inga Hrafnsson er ákveðið. „Slíkt handsal dugði ekki í gærkvöldi," sagði Vilhjálmur og vísaði til þess að hann og Björn Ingi handsöluðu það í gærkvöldi að ná sáttum í málinu.

Vilhjálmur sagði einnig óttast að starf Sjálfstæðismanna í borginn það sem af er kjörtímabilinu sé í hættu. „Nú hefst eyðslan á nýjan leik og það er áhyggjuefni.

Vilhjálmur sagðist sjá fram á að hann myndi nú hafa meiri tíma til að spila golf og eyða tíma með fjölskyldu sinni og hann bætti því við að vissulega væri áfall að lenda í svona máli, en þetta mun vera í fyrsta sinn sem meirihlutinn í borgarstjórn Reykjavíkur springur.

Hanna Birna Kristjánsdóttir sagði að sjálfstæðismenn hefðu fylgt sannfæringu sinni í málinu. Hún sagði að ágreiningur hefði komið upp og að það mál hefði verið leyst. Björn Ingi hafi hins vegar verið ófáanlegur til að taka mið af sjónarmiðum samstarfsflokksins. Gísli Marteinn Baldursson tók undir með Hönnu og sagði að þau hefðu eygt sátt við Björn Inga í málinu eftir að þau höfðu sætt sjónarmið innan borgarstjórnarflokksins.

„Það er fullkominn fyrirsláttur í málinu að hér hafi ríkt óeining," sagði Gísli Marteinn og Hanna Birna benti á að það væri sérkennilegt að nú væri verið að stofna meirihluta í borginni út frá hagsmunum Orkuveitunnar.