Dapurleg og vond tíðindi fyrir Reykjavík

„Þetta eru dapurleg og vond tíðindi fyrir Reykjavík," sagði Geir H. Haarde í samtali við Ríkissjónvarpið um þau tíðindi að Björn Ingi Hrafnsson hefði slitið samstarfi við sjálfstæðismenn í borginni og myndað meirihluta með Samfylkingunni, Vinstri - grænum og Frjálslyndum og óháðum.

Hann sagði dapurlegt að R-listinn væri aftur kominn til valda og sakaði Björn Inga Hrafnsson um að hafa ekki gengið til leiks af fullum heilidum.

Aðspurður sagði Geir að tíðindi hefðu engin áhrif á ríkisstjórnarsamstarf Samfylkingar og Sjálfstæðisflokks. Þá sagði hann pólitíska stöðu Vilhjálms sterka og að hann yrði oddviti sjálfstæðismanna í borginni út þetta kjörtímabil.

Geir sagðist ekki hrifinn af fjögurra flokka stjórnum og að þetta yrði brothætt samstarf sem hann óttaðist að bæri dauðann í sér. Þá sagði Geir að Framsóknarflokkurinn hefði leiki herfilega af sér.