Vilhjálmur ætlar að sitja áfram í borgarstjórn

Vilhjálmur Þ. Vilhjálmssson, fráfarandi borgarstjóri, segir engin alvarleg ágreiningsmál hafa verið milli sjálfstæðismanna og framsóknarmanna í borgarstjórn að undanskildum málefnum Orkuveitunnar og REI eins og fram hefði komið.

Þetta sagði Vilhjálmur á blaðamannafundi á heimili sínu í Ljáskógum sem hann boðaði til ásamt flokkssystkinum sínum í borgarstjórn. Vilhjálmur sagði ákvörðun Björns Inga Hrafnssonar, borgarfulltrúa Framsóknarflokksins, að slíta samstarfinu vera einhliða og fyrirvaralausa.

Sagði hann enn fremur að hann og Björn hefðu í gærkvöld innsiglað að halda áfram samstarfi. Þeir hafi ætlað að funda í morgun klukkan 11 en Björn ekki mætt og heldur ekki á sameiginlegan fund meirihlutans í borgarstjórn í Höfða eftir hádegið. „Ég var farinn að óttast að eitthvað hefði komið fyrir hann," segir Vilhjálmur. Segir hann Björn Inga svo hafa hitt sig á heimili Vilhjálms og tilkynnt honum að minnihlutinn hefði boðið honum samstarf sem hann hefði þegið.

Vilhjálmur sagði engan skugga hafa borið á samstarf Sjálfstæðisflokksins og Framsóknarflokksins í borginni að undanskildu REI-málinu. Sjálfstæðisflokkurinn hefði þá eindregnu afstöðu að opinber fyrirtæki ættu ekki að vera í áhættusömum rekstr og fara þannig með fé borgarbúa. Þetta væri prinsipp sem ekki væri vikið frá.

Sagði Vilhjálmur að það kæmi honum á óvart hversu Björn Ingi vildi halda öllu til streitu sem ákveðið hefði verið áður og en sjálfstæðismenn hefðu einungis hugsað um haf almennings.

Þakkaði Vilhjálmur samstarfsfólki sínu samstarfið og sagðist ekki hafa mikla trú á nýjum meirihluta. Þetta væri samsuða fjögurra flokka og hún gæfis aldrei vel. Aðeins væri búið að semja um völd og bitlinga milli nýja meirihlutans.