Dagur: Félagshyggjustjórn um almannahagsmuni

Dagur B. Eggertsson sagði á nýafstöðnum blaðamannafundi að nýr meirihluti sé félagshyggjustjórn sem sé meðal annars stofnuð um almannahagsmuni í orkumálu og um lýðræðisleg vinnubrögð. Hann segir að ekki sé búið að móta málefnaáherslur enda taki nýr meirihluti til starfa við mjög sérstakar aðstæður Hann segir að strax verði hafist handa við málefnavinnu. Hann segir að allir flokkar í nýja meirihlutanum hafi farið í gegnum kosningar fyrir rúmum ári síðan og verið með sviplíkar áherslur í flestum málum. Síðan hafi þeir rætt saman og kynnst áherslum hvers annars.

Svandís Svavarsdóttir sagðist treysta sér til þess að vinna með Birni Inga þrátt fyrir aðkomu hans að REI málinu undanfarna daga. Hún sagði að full ástæða hefði verið til þess að spyrna við fótum í þeirri atburðarrás sem hefði verið í gangi undanfarið. Umræðan hefði þurft að vera miklu opnari.

Björn Ingi Hrafnsson sagði að margt hefði komið sér mjög í opna skjöldu. Meðal annars það að borgarfulltrúar Sjálfstæðisflokksins hefðu haldið krísufundi þar sem borgarstjóri var ekki hafður með. Hann sagði að sér þætti leitt hvernig komið hefði fyrir samstarfi hans við Vilhjálms því það hefði verið mjög gott. "Ég tek þetta mjög nærri mér," sagði Björn Ingi. Hann ítrekaði það að hann væri tilbúinn til að boða til annars eigendafundar í Orkuveitunni.

Margét Sverrisdóttir sagði að það væri ánægjuefni að koma að þessu samstarfi. Það væri orðin slíkur glundroði í borgarstjórnarflokki Sjálfstæðisflokksins að það hafi verið skilda minnihlutans að mynda starfhæfa stjórn.