Rætt um REI í Höfða

Borgarstjórnarmeirihlutinn kemur saman til fundar í Höfða klukkan eitt og eftir því sem fréttastofa kemst næst á meðal annars að ræða málefni Reykjavik Energy Invest.

Framtíð hlutar Orkuveitunnar í Reykjavík Energy Invest er enn í óvissu eftir að Björn Ingi Hrafnsson, borgarfulltrúi Framsóknarflokksins, lýsti því yfir í gær að óráð væri að selja hlut Orkuveitunnar strax ólíkt því sem sjálfstæðismenn vilja.

Þó sagði Björn Ingi að það gæti verið skynsamlegt að selja lítinn hluta til að vega upp á móti því sem lagt hefur verið í þessa áhættufjárfestingu. Þetta er á skjön við það sem borgarfulltrúar Sjálfstæðismanna hafa sagt en þeir hafa lýst því yfir að þeir vilji selja hlutinn sem fyrst.

Það er því óvíst hvað meirihlutinn ákveður að gera. Hvort hann ákveði að selja hlutinn strax eða bíða með það. Á fundi borgarstjórnar í gær kom fram að allir flokkar nema Sjálfstæðiflokkurinn eru á því að bíða með að selja hlutinn í REI. Það er því ljóst að í þessu máli gæti Framsóknarflokkurinn myndað meirihluta með Samfylkingunni, F-listanum og Vinstri grænum og ákveðið að selja ekki hlutina.

Fundurinn í Höfða hafði verið boðaður fyrir allnokkru þar sem ræða átti fjárhagsáætlun borgarinnar en samkvæmt upplýsingum fréttastofu á einnig að ræða málefni REI.