Saka Sjálfstæðismenn í Kópavogi um spillingu

Spilling réð því að Guðmundur Gunnarsson var ráðinn verkefnastjóri hjá Kópavogsbæ að mati Samfylkingarmanna í bænum, en Guðmundur var meðeigandi Gunnars Birgissonar bæjarstjóra í verktakafyritæki.

Guðmundur var bæjarstjóri á Álftanesi til ársins 2006 eða allt þar til meirihluti Sjálfstæðisflokksins féll í bænum. Skömmu síðar var hann ráðinn verkefnastjóri hjá skipulagsdeild Kópavogs en staðan var ekki auglýst. Samfylkingin í Kópavogi segir Guðmund hafa verið ráðinn á launum sem eru algjörlega á skjön við það sem gengur og gerist hjá bænum. Sá starfsmaður sem áður hafi gengt starfinu hafi verið með um 167 þúsund krónur í laun en Guðmundur sé með tæpar 240 þúsund krónur í grunnlaun og fengi svo greitt fast fyrir 60 yfirvinnutíma á mánuði. Þá segir Samfylkingin að þegar kona sem gengdi nánast sama starfi og Guðmundur geri nú hafi reynt að malda í móinn vegna launanna var gerður við hana starfslokasamningur, eða með öðrum orðum, hún hafi verið rekin.

Guðríður Arnardóttir, fulltrúi Samfylkingarinnar í Kópavogi segir ráðningu og launakjör Guðmundar ekki vera neitt annað en grímulausa einkavinavæðingu

Gunnar Birgisson, bæjarstjóri Kópavogs, sagði í samtali við fréttastofu í dag ekki taka mark á þessum málflutningi. Hann segir Guðmund hafa verið hvalreka fyrir Kópavogsbæ og að augljóst sé að slíkur fengur myndi ekki koma til starfa hjá bænum á taxta launum. Málflutningur Samfylkingarinnar væri ekkert annað lágkúra í hámarki.