16 milljarða aukaútgjöld úr ríkissjóði

Óskað er eftir 16 milljarða króna aukaútgjöldum úr ríkissjóði í frumvarpi um fjáraukalög sem lagt hefur verið fram á Alþingi. Þar af óskar fjármálaráðuneytið eftir um 6,7 milljörðum króna og félagsmálaráðuneytið um 1,7 milljarð króna.

Af einstökum beiðnum ráðuneyta má meðal annars nefna:

Utanríkisráðuneytið óskar eftir 45 milljón króna fjárheimild vegna Norðurvíkings 2007, sameiginlegrar heræfingar Íslands og Bandaríkjanna. Fram kemur í skýringu með óskinni að við brotthvarf varnarliðsins á Keflavíkurflugvelli hafi forsætisráðherra og utanríkisráðherra gert samkomulag við bandarísk stjórnvöld þar sem gert er ráð fyrir árlegum sameiginlegum varnaræfingum á Íslandi.Um er ræða kostnað vegna farartækja, eldsneytis, fæðis og aðstöðu á öryggissvæði Keflavíkurflugvallar. Þá er óskað eftir 280 milljón króna framlagi til rekstur Ratsjárstofnunar. Ennfremur óskar utanríkisráðuneytið eftir 87,9 milljónum króna vegna kaupa og endurbóta á bústað ræðismanns Íslands í Þórshöfn í Færeyjum. Á móti kaupunum kemur sala á bústað varamanns sendiherra í Stokkhólms en það embætti verður lagt niður.

Sjávarútvegsráðuneytið óskar eftir 219 milljón króna hækkun á fjárveitingu til Hafrannsóknarstofnunar. Í greinargerð kemur fram að um sé að ræða meðal annars kostnað sem tilkemur vegna sameiginlegrar hvalatalningar árið 2007 og aukins eftirlits með ástandi fiskistofna við landið.

Félagsmálaráðuneytið óskar eftir aukafjárheimild upp á 1,1 milljarð króna vegna skuldbindingar ríkissjóðs til að niðurgreiða vexti af lánum sem veitt verða á árinu 2007 til byggingar 400 leiguíbúða. Bygging íbúðanna er hluti af tímabundnu átaki sem miðar að því að fjölga leiguíbúðum um 1.600 á tímabilinu 2006 til ársloka 2009.

Dómsmálaráðuneytið óskar eftir 12,5 milljón króna viðbótarfjárveitingu til björgunarsveita til kaupa á Tetra-fjarskiptabúnaði. Þá óskar ráðuneytið ennfremur eftir 79,8 milljón króna hækkun á fjárheimild ríkislögreglustjóra meðal annars vegna sérsveitarmanna og til að standa undir kostnaði við starf tengslafulltrúa embættisins í Europol. Ennfremur er óskað eftir 106,4 milljón króna viðbótarframlagi til sýslumannsins á Keflavíkurflugvelli vegna fjárhagsvanda embættisinsí árslok 2006.

Fjármálaráðuneytið óskar eftir hækkun á áætlun um afskrifaðar skattakröfur um 4 milljarða króna. Fram kemur í greinargerð að meðal annars sé um að ræða fjárheimild á móti gjaldfærslu á beinum afskriftum á kröfum sem taldar eru vera tapaðar meðal annars vegna gjaldþrota.

Sjá fjáraukalög í heild hér.