Tekjur ríkissjóðs 72 milljörðum króna hærri

Tekjur ríkissjóðs verða tæpum 72 milljörðum hærri en reiknað var með í fjárlögum ársins 2007 samkvæmt fjáraukalögum. Þar af er um helmingur tilkominn vegna aukinna tekna ríkissjóðs af sköttum á tekjur og hagnað einstaklinga.

Fram kemur í fjáraukalögum að áætlað er að heildartekjur ríkissjóðs fyrir árið 2007 verði 448,2 milljarðar króna. Fyrri áætlun gerði ráð fyrir að heildartekjur ríkissjóðs yrðu 376 milljarðar króna. Þá er áætlað að tekjuafgangur ríkissjóðs verði 66 milljarðar króna eða því sem næst 57 milljörðum meiri en í fjárlögum.

Skattar á tekjur og hagnað einstaklinga og fyrirtækja verða 28 milljörðum króna meiri en í fjárlögum. Þar af munu tekjuskattar einstaklinga skila 15 milljörðum króna meira í ríkiskassann og fjármagnstekjuskattur 12 milljörðum króna. Alls nema tekjur ríkissjóðs vegna skatta af þessu tagi 165 milljörðum króna. Þá munu skattar á vörur og þjónustu skila rúmlega 26 milljörðum meira í ríkiskassann en áætlað var í fjárlögum ársins.