Vankantar sniðnir af lögum um samgönguáætlun

Til stendur að sníða af vankanta og laga einstök efnisatriði í lögum um samgönguáætlun á næstunni og hafa drög að lagafrumvarpi verið lögð fram vegna þessa.

Fram kemur á vef samgönguráðuneytisins að breytingarnar á lögum um samgönguáætlun séu til komnar vegna breytinga sem orðið hafa á umhverfi samgöngumála, til dæmis með stofnun opinbers hlutafélags um flugvallarekstur og meiri áherslu á öryggismál.

Meðal helstu breytinga í frumvarpinu er að gera á skýrar að samgönguáætlun er í raun ein áætlun til 12 ára og að fjögurra ára áætlun sé óaðskiljanlegur hluti hennar. Þá á með lagafrumvarpinu að leyfa endurskoðun á samgönguáætlun við upphaf nýs kjörtímabils og að tryggja að forstöðumenn allra samgöngustofnana sem heyra undir samgönguráðuneytið eigi sæti í samgönguráð ef breytingar verða á því hverjar stofnanirnar eru.

Þá segir á vef samgönguráðuneytisins að ekki sé ætlunin að breyta markmiðum laga um samgönguáætlun og verður samgönguáætlunin endurskoðuð á tólf ára fresti en fjögurra ára áætlun endurskoðuð á tveggja ára fresti. Hægt er að gera athugsemdir við frumvarpið fram til 23. október en frumvarpið er hægt að nálgast á vef ráðuneytisins.