Ráðherra vill ákvæði í stjórnarskrá til verndar íslenskunni

Tryggja verður stöðu íslenskunnar með lögum og sérstöku ákvæði í stjórnarskrá að mati Þorgerðar K. Gunnarsdóttur, menntamálaráðherra. Þetta kom fram í fyrirspurnartíma á Alþingi í dag. Ráðherra segist ætla beita sér sérstaklega fyrir því að ákvæðið verði sett í stjórnarskrá.

Í fyrirspurn Ólafar Nordal, þingmanns Sjálfstæðisflokks, til menntamálaráðherra kom fram að íslenskan eigi nú undir högg að sækja. Vísaði þingmaður meðal annars til útrásarfyrirtækja þar sem enskan hefur smám saman verið að hasla sér völl.

Í svari Þorgerðar K. Gunnarsdóttur, menntamálaráðherra, kom fram að hún hyggist beita sér fyrir því að sett verði sérstakt ákvæði í stjórnarskrá sem segir að íslenska sé þjóðtunga Íslendinga. Þá ætlar ráðherra einnig að beita sér fyrir sérstökum lögum til að styrkja stöðu íslenskunnar. Ráðherra benti þó á að tunga verði ekki eingöngu varin með lögum. Sagði ráðherra að ábyrgðin hvíli einnig á herðum fyrirtækja, stofnana og einstaklinga.