Ráðherra boðar heimasíðu fyrir lesblinda

Opnuð verður sérstök heimasíða fyrir lesblinda nemendur í grunn- og framhaldsskólum í því skyni að efla upplýsingagjöf um málið. Þetta kom fram í máli Þorgerðar K. Gunnarsdóttur, menntamálaráðherra, í fyrirspurnartíma á Alþingi í dag. Þá verður gripið til margvislegra aðgerða til að bæta úrræði fyrir lesblind börn.

Atli Gíslason, þingmaður Vinstri grænna, lagði fram fyrirspurn um störf nefndar sem menntamálráðherra skipaði í nóvember árið 2006. Nefndinni var ætlað setja fram tillögur um fyrirkomulag greiningar á lestrarerfiðleikum og eftirfylgni til hagsbótar fyrir nemendur með lestrarerfiðleika.

Í svar ráðherra kom fram að nefndin hafi skilað skýrslu í apríl á þessu ári með tillögum til úrbóta. Í kjölfarið hafi verið settur af stað framkvæmdahópur sem vinnur nú í því að hrinda í framkvæmd tillögum nefndarinnar. Meðal þess er opnun heimasíðu í næsta mánuði um lesblindu til að auka upplýsingagjöf um málið. Þá verður einnig gerðar ráðstafanir til að skima fyrir lestrarvanda barna áður en skólaganga hefst auk annarra úrræða.