Vinnubrögð við sölu NATO-eigna ámælisverð

Árni Þór Sigurðsson þingmaður Vinstri-grænna telur að vinnubrögð fjármálaráðuneytisins við söluna á fyrrum eignum NATO í Hvalfirði séu ámælisverð. Hefur hann lagt fram fyrirspurn um málið á alþingi.

Í frétt um málið frá VG segir að í byrjun september sl. auglýstu Ríkiskaup f.h. fjármálaráðuneytisins til sölu eignir ríkisins í Hvalfirði. Undirbúningur málsins vekur upp fjölmargar spurningar um vinnubrögð og hvernig farið er með heimildir fjárlaga.

Ljóst er að sveitarfélagið Hvalfjarðarsveit hefur gert fjölmargar athugasemdir við vinnubrögð ríkisins og sent bréf til Ríkiskaupa þar að lútandi. Af þessu tilefni lagði Árni Þór fram á Alþingi fyrirspurn til fjármálaráðherra um málið. Um er að ræða 10 spurningar sem Árni Þór vill fá svar við.

Jafnframt hvetur Árni Þór ráðherra til að kynna sér málið gaumgæfilega og fresta sölunni þar til það hefði fengið viðunandi undirbúning, en tilboð voru opnuð hjá Ríkiskaupum nú í morgun.