13 tilboð bárust í NATO-eigur

Alls bárust 13 tilboð í fyrrum eigur NATO í Hvalfirði. Skeljungur átti efsta tilboðið og nam það 473,1 milljón kr. Meðal þeirra sem buðu í eigurnar voru Hvalfjarðarsveit og Faxaflóahafnir í sameingu.

Gísli Gíslason hafnarstjóri Faxaflóahafna segir að tilboð þeirra hafi numið 110 milljónum kr. "Við töldum það raunæft verð enda á algerlega eftir að skipuleggja svæðið og skilgreina not þess í framtíðinni," segir Gísli.

Einar Thorlacius sveitarstjóri Hvalfjarðarsveitar segir að fulltrúar frá bæði Skeljungi og Olíudreifingu hafi haft samband við sig út af þessu máli. "Ég tjáði þeim báðum að engin loforð væri hægt að gefa um að rekstur olíubirgðastöðvar yrði leyfður þarna í framtíðinni," segir Einar. "Skeljungur rennir því blint í sjóinn í þessu máli."

Eigurnar sem um er að ræða eru olíutankar, bryggjan, svefnskálar mötuneyti og ýmsar aðrar byggingar tengdar fyrrum rekstri olíustöðvarinnar auk þess búnaður sem í stöðinni er og tilheyrði rekstri hennar.