Hótel D´Angleterre valið besta hótel Danmerkur

Hótel D´Angleterre, sem íslenskt fjárfestingafélag undir forystu Gísla Reynissonar keypti nýverið, hefur verið valið besta hótel Danmerkur þetta árið. Hlýtur hótelið World Travel verðlaunin og það í fjórða sinn. Auk þess var Royal-svíta hótelsins valin besta hótelsvíta Danmerkur.

Fram kemur í tilkynningu frá fjárfestingarfélaginu Nordic Partners, sem keypti hótelið nýverið, að bestu hótelin séu valin í kosningu þar sem um 110 þúsund ferðaskrifstofur um allan heim taka þátt.

Haft er eftir Gísla Reynissyni í tilkynningunn að það sé einstaklega skemmtilegt fyrir nýja eigendur Hótels D´Angleterre að hljóta þessi verðlaun. „Verðlaunin undirstrika enn og aftur sérstöðu Hótel D´Angleterre á danska og skandinavíska hótelmarkaðnum. Fjöldi sérfræðinga í ferðaþjónustu um allan heim þekkir hótelið og hefur valið að veita okkur viðurkenningu fyrir bæði besta hótelið og bestu hótelsvítuna. Verðlaunin eru mikill heiður og um leið hvatning til að gera enn betur," segir Gísli.

Þá kemur fram að unnið hafi verið að endurbótum á hótelinu fyrir á annað hundrað milljónir króna á undanförnum árum. Árið 2006 fékk Hótel D´Angleterre 5 stjörnur í "The Michelin Guide" en ekkert annað danskt hótel hefur náð þeim árangri fyrr né síðar.