Friðarsúlan skín skært

Friðarsúlan í Viðey hefur verið tendruð. Kveikt var á súlunni við hátíðlega athöfn klukkan átta mínútur í átta í kvöld. Hún mun lýsa fram til 8. desember, dánardægurs John Lennons. Yoko Ono, ekkja Lennons sagði að súlan væri gjöf frá henni, John og íslensku þjóðinni til heimsbyggðarinnar.

Ringo Starr trommari Bítlanna og Olivia Harrison, ekkja George Harrison voru viðstödd athöfnina ásamt um þrjúhundruð gestum. Borgarstjóri Reykjavíkur sagði það mikinn heiður fyrir borgina að súlan væri staðsett í borginni.

Lag John Lennons, Imagine, var leikið undir þegar tendrað var á súlunni. Ljósið mun lýsa á hverju ári frá 9. október, fæðingardegi Lennons og fram til 8. desember, dánardægurs hans en hann féll fyrir morðingjahendi í New York árið 1980. Þá mun súlan einnig lýsa á gamlársdag, á jafndægri á vori í eina viku og á sérstökum hátíðardögum.

Hægt verður að virða súluna fyrir sér í beinni útsendingu á Vísi fram á laugardagsmorgun. Smelltu hér til þess að horfa.