Farbann og gæsluvarðhald staðfest vegna þjófnaða

Hæstiréttur staðfesti í dag farbann yfir einum af Litháunum sem eru grunaðir um stórfelldan þjófnað í verslunum hér á landi að undanförnu. Um er að ræða konu var í hópi sjö manna sem handteknir voru í síðustu viku og voru tveir þeirra úrskurðaðir í vikulangt gæsluvarðhald en fjórir í farbann.

Fram kemur í farbannsúrskurðinum að konan hafi dvalið hér frá því í lok júní og hafi takmörkuð tengsl við landið en sé undir rökstuddum grun um aðild að auðgunarbrotum. Farbannið gildir til 1. nóvember.

Þá staðfesti Hæstiréttur gæsluvarðhaldsúrskurð yfir öðrum Litháa sem handtekinn var ásamt sex öðrum í síðustu viku vegna gruns um þjófnað. Þeir voru allir úrskurðaðir í gæsluvarðhald. Gæsluvarðhaldsúrskurðurinn yfir sjömenningunum rennur út á morgun.

Ómar Smári Ármannsson, yfirmaður auðgunarbrotadeildar lögreglunnar, sagði fyrr í dag að tekin yrði afstaða til þess á morgun hvort krafist yrði áframhaldandi gæsluvarðhalds yfir mönnunum.