Stendur ekki til að einkavæða allar orkulindir

Ekki stendur til að einkvæða allar orkulindir og ekki selja Orkuveitu Reykjavíkur til einkaaðila. Þetta kom fram í máli Geirs H. Haarde, forsætisráðherra, í fyrirspurnatíma á Alþingi í dag.

Ögmundur Jónasson beindi þeirri fyrirspurn til forsætisráðherra hvernig ríkisstjórnin ætli að koma að málefnum orkufyrirtækja hér á landi. Sagði hann blikur á lofti í orkumálum landsmanna og veruleg hætta á að þjóðin missi yfirráð sín yfir orkulindunum. Sagði hann ennfremur að ákvörðun ríkisstjórnarinnar um að selja hlut sinn í Hitaveitu Suðurnesja hefðu komið af stað einkavæðingarferli hvað orkulindir varðar.

Í svari sínu sagði Geir H. Haarde að ekki stæði til að einkavæða Orkuveitu Reykjavíkur og vísaði meðal annars í orð Vilhjálms Þ. Vilhjálmssonar, borgarstjóra, og samþykkt Landsfundar Sjálfstæðisflokksins. Þá sagði ráðherra ennfremur að ekki stæði til að einkavæða allar auðlindirnar.