Birtist Paul McCartney óvænt vegna friðarsúlu?

Friðarsúla Yoko Ono verður tendruð í Viðey þegar klukkuna vantar átta mínútur í átta í kvöld í beinni útsendingu á Stöð tvö. Mikil spenna ríkir um það hvort Sir Paul McCartney birtist óvænt og verði með þeim Ringo Starr, Sean Lennon og Oliviu Harrison við athöfnina og heiðri þannig minningu John Lennons á fæðingardegi hans, en Lennon hefði orðið 67 ára í dag.

Útsending Stöðvar tvö úr Viðey hefst klukkan 19.25 en um það leyti er búist við að Yoko Ono birtist í eynni ásamt föruneyti. Vitað er að Bítillinn Ringo Starr hefur þekkst boð hennar sem og Olivia, ekkja Georg Harrisons, og eru þau væntanleg til landsins um miðjan dag.

Paul McCartney er einnig boðið en fyrir helgi var gefið út að ekki hefði borist svar frá honum. Nú fæst hins vegar ekkert uppgefið frá talsmanni Yoko Ono um hvort von sé á Paul. Það gæti bent til þess að hún haldi enn í vonina um að hann mæti. Önnur skýring gæti verið sú að hann hafi þegið boðið en af öryggisástæðum vilji menn ekki staðfesta það.

Hvort sem Paul mætir eða ekki þá er ljóst að athöfnin í Viðey í kvöld vekur heimsathygli og þannig mun sjónvarpsútsending Stöðvar tvö úr Viðey í kvöld jafnframt verða send beint til 34 erlendra sjónvarpsstöðva í Evrópu, Bandaríkjunum og Japan.