Mótmæla gjaldtöku í Hvalfjarðargöngum

Samgönguráðherra fékk í dag undirskriftalista með rúmlega eitt þúsund nöfnum fólks sem mótmælir gjaldtöku í Hvalfjarðargöngum.

Nokkrir áhugamenn um málið söfnuðu undirskriftalistunum á tjaldstæðum og öðrum samkomustöðum ferðamanna í sumar. Um helmingur þeirra sem skrifuðu undir er húsbílaeigendur, en meðal þeirra er veruleg óánægja með að þurfa að borga í Hvalfjarðargöngin.

Þeir sem skrifa undir listann benda á að hvergi annars staðar á landinu sé tekinn vegatollur á þjóðvegi númer eitt og að bifreiðaeigendur greiði nú þegar 48 milljarða króna í bifreiðatengd gjöld.