Toppskarfur í útrýmingarhættu við Íslandsstrendur

Toppskarfur við Íslandsstrendur stefnir í útrýmingarhættu og flestir aðrir sjófuglar á norðurslóðum eru á hröðu undanhaldi. Þetta kemur fram í drögum að skýrslu um fuglalíf á norðurslóðum.

Hópurinn er að skoða helstu þætti sem ógna stofninum, bæði náttúrulega og af mannavöldum. Að sögn Ævars Petersen fuglafræðings, sem er í hópnum, er til dæmis talið að að slæm umgengni um olíu og olíuúrgang dags daglega og minni háttar óhöpp hafi mun skaðlegri áhrif á sjófuglastofnana en stóru olíuslysin þegar olíuskip farast.

Áætla megi að um 130 þúsund sjófuglar drepist í fiskinetum hér við land á ári hverju, einkum í þorskanetum. Þá eigi mengun af völdum eiturefna að líkindum einhvern þátt í versnandi ástandi stofnanna og svo eru sumir þeirra nytjaðir til matar, bæði egg og fuglarnir sjálfir.

Síðan hefur hlýnun sjávar hrakið rauðátuna langt norður i höf,en hún er uppistaða í fæðu sandsílisins sem aftur er uppistaða í fæðu sjófuglanna. Þetta hefur meðal annars leitt til þess að kríuvarp hefur misfarist hér á landi á stórum svæðum ár eftir ár og svipaða sögu er að segja af lundavarpi.