Menningarhúsið á Akureyri klætt stuðlabergi

Þrjú þúsund tonna stuðlabergsklæðning sem þekja mun menningarhúsið á Akureyri hefur vakið mikla athygli. Svo gæti farið að stuðlabergið yrði að tískufyrirbrigði.

Stuðlabergið er úr efni sem ættað er úr námu í Hreppunum, einu námu landsins þar sem hægt er að nálgast stuðlaberg. Vinna við klæðninguna hófst fyrir rúmum hálfum mánuði og hefur það komið hlutaðeigandi á óvart hve vel verkið gengur.

Þar sem stuðlabergsklæðning sem þessi hefur aldrei áður verið sett á heilt hús hér innanlands þá höfðu bæjaryfirvöld til vara áætlun um að klæða húsið kopar. En nú þegar þetta gengur svo vel, hafa fleiri velt fyrir sér samskonar klæðningu.

Það eru tékkneskir steinsmiðir sem sjá um að setja upp klæðninguna en hún kostar um 65 milljónir króna. Heildarkostnaður við menningarhúsið mun aftur hlaupa á 3 milljörðum. Búist er við að húsið verði vígt árið 2009.