Dorrit vísar fréttaflutningi DV á bug

Dorrit Moussaieff fosetafrú segist vera særð og móðguð yfir fréttaflutningi DV í dag. Þar er sagt að Dorrit hafi verið ein af styrktaraðilum verðlauna sem Ólafur Ragnar Grímsson, forseti, hafi veitt viðtöku 23. september sl.

„Það særir mig að DV skuli birta ranga frétt um að ég hafi „borgað verðlaun" sem Louise T Blouin stofnunin veitti eiginmanni mínum fyrir framlag hans til umhverfismála við hátíðlaega athöfn í New York. Einu tengsl mín við Louise T Blouin stofnunina eru að ég bauð í nútímalistaverk á uppboði sem haldið var snemma árs 2006 í tilefni af opnun listasafns stofnunarinnar í Lundúnum. Að auki hef ég veitt fulltrúa fjölmiðlafyrirtækis, sem tengt er Louise T Blouin og gefur út um 200 áhrifarík tímarit um listir, upplýsingar um ungt, íslenskt myndlistarfólk. Þetta er ástæða þess að í þakkarskrá stofnunarinnar fyrir árið 2006 er ég nefnd meðal stuðningsaðila (e. supporters). Þessar staðreyndir munu fulltrúar Louise T Blouin stofnunarinnar staðfesta.

Að gera því skóna að eiginmaður minn hafi hlotið þessi verðlaun vegna þess að ég hafi borgað fyrir þau er í senn móðgandi og særandi."

Undir þessa yfirlýsingu skrifar Dorrit Moussaieff.