Ragnar Hall flytur mál Svandísar

Ragnar H. Hall hæstaréttarlögmaður hefur tekið að sér að flytja mál Svandísar Svavarsdóttur, fulltrúa Vinstri - grænna í stjórn Orkuveitu Reykjavíkur, vegna eigendafundar Orkuveitunnar í síðustu viku þar sem tilkynnt var um samruna Reykjavik Energy Invest og Geysi Green Energy.

Svandís hefur í fjölmiðlum bent á að fundurinn hafi verið boðaður með sólarhringsfyrirvara en boða ætti til slíkra fundi með minnst viku fyrirvara. Helgi Jóhannesson hæstaréttarlögmaður sat fundinn og úrskurðaði hann löglegan en það sættir Svandís sig ekki við og hefur um helgina undirbúið málssóknina.

Ragnar Hall hæstaréttarlögmaður staðfesti við Vísi í dag að hann hefði tekið að sér málið. Hann ætti eftir að fara yfir gögn málsins og því vildi hann aðspurður ekki tjá sig um hvort hann teldi að brotið hefði verið gegn lögum við boðun fundarins. Þá sagðist hann ekki vita hvenær málið yrði þingfest.

Ragnar er mjög reyndur lögmaður og hefur verið hæstaréttarlögmaður í 15 ár. Þá gegndi hann stöðu borgarfógeta í um tíma.

Enn fundað í Ráðhúsinu

Borgarfulltrúar Sjálfstæðisflokksins sitja nú á fundi til þess að ræða málefni Reykjavik Energy Invest, sem borgin á um þriðjungshluti í, en engin tíðindi hafa borist af honum. Fundurinn hófst á hádegi.