Staðfest að Ringo og Olivia komi

Nú hefur verið staðfest að Ringo Starr og Olivia Harrison ekkja Georgs Harrison munu koma til landsins og verða viðstödd í Viðey þegar friðarsúla Yoko Ono verður formlega tekin í notkun á morgun. Hinsvegar hefur Paul McCartney afboðað komu sína.

Þetta er ekki í fyrsta sinn sem Ringo Starr heimsækir Ísland því hann kom til Atlavíkur um verslunarmannahelgina 1985 þá í boði Stuðmanna. Meðal þeirra sem honum varð vel til vina þá var Júlíus Agnarsson hljóðmaður Stuðmanna.

Júlíus ætlar ekki út í Viðey til að verða viðstaddur friðarsúluathöfnina. Aðspurður um hvað hann myndi segja við Ringo ef hann hittir hann á förnum vegi í Reykjavík segir Júlíus: "Ætli það verði ekki bara mannstu eftir mér?"