Sakfelldur fyrir að ráðast tvisvar á sama manninn

Héraðsdómur Vestfjarða dæmdi í morgun karlmann um tvítugt í tveggja mánaða skilorðsbundið fangelsi fyrir að ráðast tvisvar á sama manninn með um mánaðarmillibili. Var hann jafnframt dæmdur til að greiða fórnarlambi sínu rúmar 360 þúsund krónur í miska- og skaðabætur.

Fyrri árásin átti sér stað í Bolungarvík í apríl en þá réðst hinn ákærði á manninn, skallaði hann og sló í andlitið og kýldi í skrokk með þeim afleiðingum að fórnarlambið hlaut ýmis meiðsl. Í síðara tilvikinu, sem átti sér stað í Súðavík í maí, réðst maðurinn á sama mann, sló hann í andlitið og sparkaði í gagnauga hans þannig að hann hlaut meðal annars glóðarauga og það flísaðist úr framtönn. Maðurinn játaði á sig báðar árásir en tók það fram að í síðara tilvikinu hefði fórnarlambið manað hann í slagsmál við sig.

Við ákvörðun refsingar horfði dómurinn til þess að maðurinn hefði í tvígang ráðist harkalega að fórnarlambi sínu en það var virt honum til málsbóta að hann játaði brot sín fyrir dómi. Enn fremur var horft til þess að maðurinn hafði ekki áður komist í kast við lögin og þess hve ungur hann er. Þótti tveggja mánaða fangelsi sem skilorðsbundið er til tveggja ára hæfileg refsing.