Lést eftir líkamsárás

Maðurinn sem fannst illa leikinn í íbúð sinni við Hringbraut í Reykjavík í gærdag er látinn. Hann lést af sárum sínum á gjörgæsludeild í nótt.

Maðurinn sem var á fimmtugsaldri fannst í íbúð sinni um klukkan hálftvö í gær og var hann þar rænulaus í blóði sínu. Það var kunningi mannsins sem kom að honum og gerði lögreglu viðvart.

Strax var ljóst hve alvarleg árásin var en í fyrstu var ekki vitað hvenær hún átti sér stað né hver árásarmaðurinn var. Kunninginn, sem er á fertugsaldri, var hins vegar handtekinn skömmu síðar grunaður um verknaðinn. Yfirheyrslur yfir manninum eru að hefjast og ákveðið verður eftir hádegi í dag hvort krafist verði gæsluvarðhalds yfir honum.

Ekki verður greint frá nafni hins látnað að svo stöddu.