Verslun í eigu íslensks verðbréfafyrirtækis hlýtur verðlaun í Lundúnum

Verslunin Duchamp Store við Regent Street í Lundúnum, sem er að stórum hluta í eigu íslensks verðbréfafyrirtækis, var útnefnd „besta litla verslunin í London" á verðlaunahátíðinni Retail Interior Awards í Lundúnum í síðustu viku.

Eftir því sem segir í tilkynningu frá verðbréfafyrirtækinu Arev á systurfélag þess í Bretlandi 70 prósenta hlut í Duchamp en stjórnendur eiga 30 prósenta hluta. Verslunin var opnuð fyrir rúmu ári og selur herraskyrtur og fylgihluti. Segir í tilkynningunni að verðlaunin séu mikill heiður fyrir eigendur og stjórnendur Duchamp að hljóta þessa útnefningu nú því sjaldgæft er að verslanir í Lundúnum nái þessum árangri eftir svo skamman tíma í rekstri.

Retail Interior verðlaunin voru nú veitt í tíunda sinn en þau eru veitt í nokkrum flokkum. Meðal annarra vinningshafa voru Selfridges, Marks&Spencer og Habitat.