Vilja þingmenn með í baráttu gegn Guantánamo og leynifangelsum

Íslandsdeild Amnesty International hefur sent öllum þingmönnum landsins bréf þar sem þeir eru hvattir til að skrifa undir áætlun samtakanna um að binda enda á ólöglegt varðhald í hinu svokallaða stríði gegn hryðjuverkum.

Í tilkynningu frá samtökunum segir að stefnt sé að því að fá þúsund þingmenn um allan heim til að taka þátt í aðgerðum samtakanna og þrýsta þannig að á Bandaríkjastjórn að loka bæði leynifangelsum og fangabúðunum við Guantánamo-flóa. Þegar hafa nokkrir íslenskir þingmenn skrifað undir áætlun Amnesty International.

Þá segir í tilkynningu Amnesty að George W. Bush forseti hafi sagst ætla loka Guantánamo en samtökin hvetja til þess að það sé gert með því að virða réttindi fanganna þannig að þeir verði sóttir til saka fyrir dómi sem stenst alþjóðleg viðmið um réttláta dómsmeðferð.

„Lokun Guantánamo má heldur ekki nota sem afsökun til að flytja fanga annað eða til að draga athygli frá því kerfi framsals og leynivarðhalds sem Bandaríkin viðhalda," segir Íslandsdeild Amnesty International.