Sjálfstæðismenn funda í dag

Borgarstjórnarfulltrúar Sjálfstæðisflokksins koma saman til fundar í dag til að ræða aðild Orkuveitu Reykjavíkur að sameiningu Reykjavík Energy Invest og Geysir Green Energy og verður jafnvel boðað til blaðamannafundar að honum loknum.

Fram hefur komið gagnrýni á framgöngu Vilhjálms Þ. Vilhjálmssonar frá mönnum í röðum borgarfulltrúa flokksins. Meðal hugmynda, sem væntanlega verða ræddar á fundinum eru að Reykjavík selji hlut sinn í nýja sameinaða fyrirtækinu, að Haukur Leósson láti af stjórnarformennsku í Orkuveitunni og að einhver borgarfulltrúi taki við stöðunni.

Einnig verður hugsanlega rætt hvort standa eigi við það fyrirheit , að Björn Ingi Hrafnsson fulltrúi Framsóknarflokks í borgarstjórn taki við stjórnarformennskunni um mitt næsta ár. Þá ætla þing- og sveitarstjórnarmenn Framsóknarflokksins að ræða þetta mál í dag, en Björn Ingi hefur sætt gagnrýni úr þeirri átt.