Aðsóknarmet í sundlaugina í Bolungarvík

Fjöldi gesta í sundlaugina í Bolungarvík hefur aldrei verið meiri en undanfarna daga. Um síðustu helgi sóttu um 400 manns sundlaugina heim sem er aðsóknarmet.

Þar með var slegið aðsóknarmet sem sett var fyrst eftir að laugin var opnuð en þá bjuggu þrisvar sinnum fleiri í Bolungarvík. Nú eru íbúar bæjarins um 900 hundruð talsins sem þýðir að tæplega helmingur íbua hafi farið í laugina liðna helgi.

Þessa miklu aðsókn má rekja til þess að ný vatnsrennibraut í sundlaugagarðinum nýtur mikilla vinsælda.

Heiðurinn af henni á Hrannar Egilsson, átta ára sem gekk á fund bæjarstjóra, þá fimm ára gamall, með teikningu af vatnsrennibraut og stakk upp á því að henni væri fundinn staður í sundlaugagarðinum. Hafþór Gunnarsson, fréttaritari okkar í Bolungarvík ræddi við Hrannar á dögunum. Í því samtali sagði Hrannar að hann hafi gengið á fund bæjarstjóra með teikningu af rennibrautinni. Ástæðan fyrir því hafi verið sú að víða um land séu vatnsrennibrautir við sundlaugar og því hafi honum þótt tilvalið að hafa eina slíka í Bolungarvík.

Á vef Bolungarvíkur segir að mikil ánægja sé meðal sundlaugagesta með þessa viðbót við sundlaugina enda virðist framkvæmdin hafa tekist vonum framar og ungir og aldnir hafa sótt laugina heim. Það styttist þó í að vatnsrennibrautinni verði lokað því ekki gert ráð fyrir að hún sé opin yfir háveturinn.