Milljónatjón verður úr sögunni

Tugmilljónatjón verður árlega þegar ökumenn dæla röngu eldsneyti á bíla sína. Þetta tjón getur heyrt sögunni til því fram er komin ný lausn sem á að tryggja að ekki er lengur hægt að dæla röngu eldsneyti á bílinn.

Það lætur nærri að átta hundruð bíleigendur hafi orðið fyrir tjóni á síðasta ári sökum þess að þeir dældu röngu eldsneyti á bifreiðina. Það gerist því um það bil tvisvar á dag að meðaltali að ökumenn hér verði fyrir þessu óláni. Oftast er þá bensíni dælt á dísilbíl.

Mistök af þessu tagi geta valdið verulegum skemmdum á bílvélum og hreinsibúnaði fyrir útblástur segir Runólfur Ólafsson, framkvæmdastjóri FÍB. Runólfur segir að versta tjónið á þessu ári nemi um hálfri milljón króna.

FÍB hefur lagt hart að olíufélögunum að leysa þennan vanda ökumanna og talsmenn Atlantsolíu segjast hafa leyst þetta vandamál.

Atlantsolía hefur nú forritað dælulykilinn svokallaða á þann veg að lykillinn opnar eingöngu fyrir dælingu á réttri eldsneytistegund. Þetta þýðir að þeir sem aka um á dísilvagni, og hafa dælulykil, geta látið forrita dælulykilinn þannig að hann opni eingöngu fyrir dælingu á slíku eldsneyti.

Þetta kemur í veg fyrir stórtjón segir Albert Þór Magnússon, framkvæmdastjóri Atlantsolíu sem hefur sjálfur orðið fyrir því óláni að dæla röngu eldsneyti á bílinn sinn. Hann þekkir því þennan vanda að raun eins og þúsundir Íslendinga.