Ísafjarðarbær samþykkir nýtt stjórnskipulag

Bæjarstjórn Ísafjarðarbæjar samþykkti samhljóða á fundi sínum í gær nýtt stjórnskipulag fyrir Ísafjarðarbæ. Hinu nýja stjórnskipulagi er ætlað að bæta þjónustu og auka skilvirkni.

Með breytingunni verði til þrjú ný störf hjá bænum. Það er starf mannauðsstjóra, umhverfisfulltrúa og starf umsjónarmanns eigna.

„Algjör samstaða er í bæjarstjórn um stjórnskipulagsbreytingarnar. Þeim er ætlað að bæta þjónustu bæjarfélagsins, auka skilvirkni og yfirsýn og nýta enn betur þann auð, sem fólginn er í því góða starfsfólki er vinnur hjá Ísafjarðarbæ.", segir í tilkynningu frá Ísafjarðarbæ.

Tillögur að breyttu stjórnskipulagi voru unnar af sérstakri nefnd er bæjarstjórn skipaði á fundi sínum þann 26. apríl nefnd um endurskoðun stjórnsýslu og bæjarmála- samþykktar Ísafjarðarbæjar.