Lettarnir aldrei starfsmenn GT verktaka

Gt verktakar, sem nýverið voru kærðir fyrir að hafa ekki staðið rétt að launagreiðslum til 13 lettneskra verkamanna sem voru á þeirra vegum að vinna við aðrennslisgöng Kárahnjúkavirkjunnar, segja að umræddir verkamenn séu ekki, og hafi aldrei verið starfsmenn fyrirtækisins.

Í fréttatilkynningu sem GT verktakar sendu frá sér í dag segir:

Vegna frétta í fjölmiðlum í gær og í dag, af málefnum 13 lettneskra verkamanna og kæru á hendur GT verktökum í Hafnarfirði. GT verktakar vilja taka fram að umræddir verkamenn eru ekki og hafa aldrei verið starfsmenn fyrirtækisins.

Um er að ræða verkamenn sem eru starfsmenn starfsmannaleigunnar Nordic Construction Line (NCL). Starfsmannaleigan hefur séð um og er með ráðningarsamninga við verkamennina og þeir fá greidd laun í samræmi við Virkjanasamninginn. Um þetta er öllum hlutaðeigandi fullkunnugt, þ.m.t. AFLI og Vinnumálastofnun.

Fulltrúi NCL hér á landi hefur séð um launagreiðslur og þær eru GT Verktökum óviðkomandi.

Launaseðlar vegna vinnu verkamannanna eru gefnir út af NCL. Þar eru tilgreindar allar tekjur, svo sem unnar vinnustundir, vaktaálag, yfirvinna og orlofstímar. Á launaseðlum koma einnig fram frádráttaliðir, iðgjald í lífeyrissjóð, félagsgjald og staðgreiðsla skatta.