Björgunarskólinn þrítugur

Björgunarskóli Slysavarnafélagsins Landsbjargar var stofnaður þann 30. september árið 1977 og varð því þrítugur sl. sunnudag. Til að fagna þessum áfanga hefur formönnum eininga félagsins og öðrum velunnurum skólans verið boðið til veislu í höfðuðstöðvum félagsins í Skógarhlíð 14 í dag og hefst hún kl. 17.00.

Þar verður starfsemi skólans kynnt, nýtt skráningakerfi tekið formlega í notkun auk þess sem sýndur verður fjarfundabúnaður sem skólinn hefur nýverið fest kaup á.

Skólinn hefur haldið uppi öflugu fræðslustarfi fyrir félaga í samtökunum og aðra landsmenn. Á hverju ári eru haldin um 180 námskeið um land allt og er fjöldi þátttakenda um 3500 manns ár hvert. Skólinn er farskóli sem heldur námskeið í húsnæði björgunarsveita um land allt. Auk þess er skólinn í fararbroddi í þróun fræðslustarfs björgunarsveita í landinu.