Úrhelli víða við það að slá met

Úrhellisrigning suðvestanlands er víða nærri því að slá met og í Bláfjöllum jafngildir úrkoman níu sentímetra djúpu vatni yfir allt.

Þar nam úrkoman um það bil 88 millímetrum og var gríðarlegur vatnsagi í hlíðum fjallanna. Hins vegar hefur aldrei frosið í jörðu í haust þannig að vatnið kemst óhindrað niður í jarðveginn, sem víða er orðinn vatsósa en ef frost hefði verið undir væri veruleg skriðuhætta víða.

Reyndar hrundi grjót á þjóðveginn í Súðavíkurhlíð á milli Ísafjarðar og Súðavíkur í nótt. Þetta gerðist á nokkuð löngum kafla og er rakið til rigninga.

Töluverður vantsagi er á götum á höfuðborgarsvæðinu og ekki bætir úr skák að tré hafa fellt mikið af laufi sínu vegna hvassviðris og vill það stífla niðurföllin. Fréttastofunni er þó ekki kunnugt um vatnstjón af völdum vatnsagans. Búist er við áframhaldandi rigningu suðvestanlands í allan dag og að hún muni aukast norðanlands þegar líður á daginn.