Auka útgjöld vegna vettvangsferða

Auka þarf útgjöld til vettvangsferða í skólum Reykjavíkur um tugi milljóna króna svo ferðirnar leggist ekki af. Menntaráð Reykjavíkur hefur falið fræðslustjóra að gera ráð fyrir þessari aukningu í næstu fjárhagsáætlun.

Undanfarin ár hafa grunnskólar í síauknum mæli látið nemendur greiða fyrir ýmsar ferðir sem skólarnir skipuleggja og farnar eru á skólatíma. Skólastjórnendur hafa margir hverjir borið því við að nemendur geri valið um að fara í ferðirnar eða ekki og því séu þær ekki hluti af skyldunámi.

Eins og greint hefur verið frá í fréttum þá lítur menntamálaráðuneytið svo að grunnskólunum beri að greiða fyrir allar ferðir sem farnar eru á skólatíma. Í fréttum Stöðvar tvö þann 19. september sagði fræðslustjóri Reykjavíkur óttast að vettvangsferðir myndu leggjast af skilgreining menntamálaráðuneytisins yrði ofan á.

Nú hefur menntaráð Reykjavíkur falið fræðslustjóra að gera ráð fyrir auknum útgjöldum vegna vettvangsferða í næstu fjárhagsáætlun. Líklegt er talið að aukningin muni nema tugum milljóna.

Júlíus Vifill Ingvarsson formaður menntaráðs sagði í samtali við fréttastofu að verið sé að fara yfir hversu mikla fjármuni þurfi til málaflokksins. Hann sagði það alveg klárt af hálfu borgaryfirvalda að slíkar ferðir eigi að vera á kostnað borgarinnar en ekki nemenda, enda komi slíkur kostnaður vissulega við pyngju foreldra.

Júlíus sagði að nú væri verið að fara yfir það hvaða ferðir borgin greiði fyrir og hverjar ekki enda ekki eðlilegt að skólayfirvöld greiði fyrir ferðir sem nemendur eða foreldrar standi fyrir, eins og námlokaferðir tíundabekkinga og aðrar slíkar skemmtiferðir.