Mótmæla veru Íslands í NATO

Ungliðahreyfing Vinstri - grænna hyggst standa fyrir friðsömum mótmælum við Laugardalshöllina í fyrramálið en þar fer nú fram ársfundur NATO-þingsins.

Fram kemur í tilkynningu frá ungum vinstri - grænum að til standi að kveikja á 58 kertum, sem tákna eiga þau ár sem Ísland hefur verið aðili að NATO. Með þessu vill hreyfingin minnast óteljandi fórnarlamba hernaðaraðgerða NATO og minna þannig þingfulltrúa á alvarleika hernaðar og hvetja íslensk stjórnvöld til að segja sig tafarlaust úr NATO eins og segir í tilkynningu frá UVG. Að því loknu skunda ungliðarnir á landsfund sinn sem einnig er haldinn um helgina.